Нарыг та нар ямар өнгөтэй гэж бодож байна? Бидний нүдээр нар шар юм уу, улаан эсвэл улбар шараар харагддаг. Үнэн хэрэгтээ наранд бүх өнгө холилдсон байдаг байна. Энэ бүх өнгө нь бидний нүдэнд цагаан болж харагддаг.
Өглөө нар мандахад эсвэл орой нар жаргахад нар нь шар, улаан, эсвэл улбар шараар харагддаг. Яагаад ? Учир нь богино долгионы урттай өнгүүд нь (цэнхэр, ногоон, ягаан) дэлхийн агаар мандлаар нэг цацагдаж зөвхөн шар, улаан, улбар шар өнгүүд л зузаан агаар мандлыг нэвтэрч чаддаг учир бидний нүдэнд эдгээр өнгүүд үзэгддэг аж. Мөн тухайн үеүдэд (нар тэнгэрийн хаяан дээр ирэх үед ) нарнаас ирэх гэрэл нь илүү их агаар мандлыг туулдаг байна. Ингэснээр цэнхэр гэрэл нь аль хэдийнээ цацагдаж орхисон байх бөгөөд зөвхөн улаан л үлддэг. Маш ховор тохиолдолд ногоон гэрэл үзэгддэг билээ. Энэхүү тохиолдол нь нар жаргах эсвэл мандах үед л харагддаг юм.
Нар өндөрт мандсан үед богино долгионууд голдуу цэнхэр нь агаар мандал дахь молекулуудыг мөргөж ийш тийш ойн цацагддаг учир манай тэнгэр цэнхэр өнгөтэй юм шиг харагддаг.
Зарим хүмүүс агаар мандалд хангалттай цэнхэр өнгө тархсан учраас нар шар өнгөтэй харагддаг гэж үздэг. Харин та юу гэж бодож байна?
Гэрэл болон энергийн бүх төрлүүд нь цахилгаан соронзон спектрийн ер бусын үзэгдэлд ордог. Харин бидний нүд энэхүү энергийн зөвхөн өчүүхэн л хэсгийг хүлээн авч чаддаг. Үүнийг үзэгдэхүйц гэрэл гэдэг. Радио долгион, рентген туяа (x-ray), микро долгион, гамма туяа нь үзэгдэхүйц гэрлээс илүү урт болон богино долгионтой байдаг байна. Гэхдээ бүгд цахилгаан соронзон спектрт ордог. Шинжлэх ухааны тоног төхөөрөмжүүдийн ачаар бидний нүд үзэж чадахааргүй зүйлийг бүтээлээр нь үзэж чаддаг аж.